Marc Cucurella: “I mbaj flokët e gjata që djali im të më njohë në fushë”

TIRANË, 23 korrik, ATSH/ Flokët e gjata dhe kaçurrela të Marc Cucurellës janë bërë prej vitesh një nga tiparet më të dallueshme të mbrojtësit të Chelseat dhe të kombëtares së Spanjës. Megjithatë, pas këtij imazhi karakteristik nuk fshihet një zgjedhje stili apo mode, por një arsye thellësisht personale dhe emocionale.

Futbollisti spanjoll ka treguar se vendosi të mos i presë flokët për djalin e tij të madh, Mateo, i cili është në spektrin e autizmit. Në një ndeshje futbolli, ku në fushë ndodhen 22 lojtarë dhe ritmi i lojës është i shpejtë, kaçurrelat e Cucurellës e ndihmojnë Mateon ta identifikojë menjëherë dhe ta ndjekë gjatë gjithë ndeshjes.

“I mbaj flokët e gjata që djali im të më njohë në fushë”, ka rrëfyer mbrojtësi, duke zbuluar historinë prekëse.

Historia e mbrojtësit spanjoll ka prekur mijëra tifozë në rrjetet sociale, të cilët e kanë cilësuar atë si një shembull se gjestet më të bukura nuk maten me trofe apo statistika. Edhe pse Cucurella është pjesë e elitës së futbollit europian dhe ka fituar trofe të rëndësishëm me klubin dhe kombëtaren, për të arritja më e rëndësishme është të jetë një baba i pranishëm dhe i kujdesshëm.