Masa e sigurisë për 14 protestuesit e arrestuar, qytetarët mblidhen para Gjykatës së Tiranës

Qytetarë dhe protestues janë mbledhur këtë të premte para Gjykatës së Tiranës, ku pritet të zhvillohet seanca për caktimin e masës së sigurisë për 14 protestuesit e arrestuar dy ditë më parë, pas përplasjeve me Policinë e Shtetit.

Protesta e sotme shënon ditën e 97-të të protestave qytetare në Tiranë. Protestuesit ishin njoftuar një ditë më parë për tubimin para gjykatës, në mbështetje të personave të arrestuar.

Me thirrjet “Çuna, goca, jemi këtu” dhe “E gjithë Shqipëria është me ju”, protestuesit kanë kërkuar lirimin e menjëhershëm të 14 të arrestuarve.

Dy ditë më parë, gjatë protestës, Policia e Shtetit ndërhyri për të shpërndarë protestuesit, ndërsa në zonë ishin dislokuar forca të shumta policie dhe të FNSH-së.

Pas përplasjeve, në polici u shoqërua edhe një prej organizatorëve të protestës, Dritan Goxhaj.

Kërkesa kryesore e protestuesve vijon të jetë largimi i kryeministrit Edi Rama nga detyra.