Meta: Fushata e Halim Kosovës, një risi pozitive dhe standard i ri në politikë

Kryetari i Kuvendit, Ilir Meta vlerësoi të martën kandidimin në zgjedhjet e 21 qershorit të doktor Halim Kosovës, duke e konsideruar fushatën e tij një risi pozitive.

“Sjellja e doktor Kosovës sjell një standard të ri dhe politika ka nevojë për më shumë qytetari. Fushata e doktor Kosovës është një risi pozitive”, thuhet në një mesazh të kreut të Kuvendit, njëkohësisht kryetar i Lëvizjes Socialiste për Integrim(LSI).

Halim Kosova ishte kandidati i koalicionit të djathtë për bashkinë e Tiranës. Megjithëse kanë mbetur dhe pak kuti për të përmbyllur procesin e numërimit në Tiranë ai është humbës në këto zgjedhje në garën me kandidatin e majtë, Erjon Veliaj.