Milatović: Mali i Zi gati për anëtarësim në BE në 2028

Presidenti i Malit të Zi, Jakov Milatović, deklaroi se vendi i tij synon të jetë gati për anëtarësim në Bashkimin Evropian në vitin 2028. Në një bisedë me gazetarë gjermanë dhe Programin Ndërkombëtar të Gazetarisë (IJP), ai theksoi: “Qëllimi ynë është i qartë — deri në fund të 2026-s mbyllim kapitujt e mbetur negociues dhe të jemi gati për anëtarësim në BE në 2028”.

Milatović nënvizoi se rruga evropiane nuk është vetëm çështje afatesh e kapitujsh, por rezultatesh konkrete për qytetarët. Sipas tij, lufta kundër korrupsionit duhet të japë më shumë dënime të formës së prerë, veçanërisht në rastet e korrupsionit të lartë dhe krimit të organizuar, duke treguar se askush nuk është mbi ligjin.

Sundimi i ligjit, institucionet e pavarura dhe mbrojtja e të drejtave themelore, sipas presidentit malazez, mbeten testi kyç i vendit në rrugën drejt BE-së.

Mali i Zi konfirmon orientimin e tij evropian me harmonizim të plotë me Politikën e Përbashkët të Jashtme dhe të Sigurisë së BE-së, duke synuar të hyjë në Union si anëtare e besueshme dhe e përgjegjshme. Milatović vlerësoi se Samiti BE–Ballkani Perëndimor në Tivat dhe vizita e parë e kancelarit gjerman në Mal të Zi konfirmojnë një moment të ri evropian, ndërsa Gjermania mbetet një nga partnerët kyç të vendit.

Burimi: RTCG