Milatoviq prezantoi nismën “Shteti ekologjik 2.0”: Zhabljaku statusi i kryeqytetit ekologjik, hyrje falas në parqet kombëtare

Presidenti i Malit të Zi, Jakov Milatoviq, prezantoi nismën “Shteti ekologjik 2.0” me rastin e 35-vjetorit të Deklaratës së Zhabljakut, me të cilën Mali i Zi u shpall më 20 shtator 1991 shteti i parë ekologjik në botë. Nisma u hartua pas një tryeze të rrumbullakët me aktivistë ekologjikë dhe akademikë.

Propozohet që Zhabljaku të shpallet kryeqytet ekologjik i Malit të Zi, me një program të veçantë zhvillimi që përfshin infrastrukturën komunale, menaxhimin e mbetjeve, efikasitetin energjetik, turizmin e qëndrueshëm dhe edukimin ekologjik.

Milatoviq propozoi gjithashtu që qytetarëve malazezë t’u garantohet hyrje falas në parqet kombëtare, të shqyrtohet një taksë ekologjike e dedikuar për automjetet — e ashtuquajtura “vinjeta e gjelbër” — me fonde të destinuara në mënyrë transparente vetëm për mbrojtjen e natyrës, si dhe që ndotësit të mbajnë përgjegjësi të plotë, me sanksione të ashpra dhe pagesën e kostove të pastrimit.

Mes masave të tjera janë: krijimi i një baze kombëtare të dhënash për biodiversitetin, një kadastër dixhitale publike e natyrës së mbrojtur, një bankë kombëtare e gjeneve të bimëve, parandalimi i zjarreve në pyje përmes kamerave termike dhe dronëve, një studim i pavarur për ndikimin e turizmit të kroçerave në Gjirin e Kotorrit, kufizimi afatgjatë i ndërtimit përgjatë bregdetit dhe mbrojtja e ujit të pijshëm si e drejtë themelore.

Vëmendje e veçantë i kushtohet çështjeve lokale: mbrojtjes përfundimtare të kodrës Spas në Budvë dhe mbrojtjes së plotë të Valdanosit në Ulqin — deti, bregdeti, ullishtet tradicionale dhe peizazhi kulturor.

Burimi: RTCG