MILLATOVIQ PREZANTON NISMËN “SHTETI EKOLOGJIK 2.0” ME 20 PROPOZIME PËR MALIN E ZI

_{Foto: predsjednik.me}

Presidenti i Malit të Zi, Jakov Millatoviq, ka prezantuar nismën “Shteti Ekologjik 2.0”, me 20 propozime konkrete për forcimin e mbrojtjes së natyrës dhe zhvillimin e qëndrueshëm të vendit, në përvjetorin e 35-të të shpalljes së Malit të Zi si shteti i parë ekologjik në botë.

Nisma, e hartuar në bashkëpunim me aktivistë ekologjikë dhe përfaqësues të komunitetit akademik, parashikon ndër të tjera hyrje falas në parqet kombëtare për shtetasit e Malit të Zi, shpalljen e Zhablakut kryeqytet ekologjik, krijimin e një baze kombëtare të të dhënave për biodiversitetin dhe një kadastri digjital publik për zonat e mbrojtura.

Në fokus janë edhe mbrojtja parandaluese e zonave të ardhshme Natura 2000, forcimi i sistemit të mbrojtjes së pyjeve nga zjarret dhe përcaktimi i zonave të përshtatshme për zhvillimin e energjisë diellore dhe të erës.

Propozimet përfshijnë gjithashtu masa për mbrojtjen e bregdetit dhe ujërave, përgjegjësi më të madhe për ndotësit, menaxhim më të qëndrueshëm të turizmit në Gjirin e Kotorrit, sistem depozitimi për ambalazhet, prokurime publike të gjelbra, zhvillimin e energjisë së gjelbër dhe mbrojtjen e burimeve ujore. Si shembuj konkretë të mbrojtjes lokale përmenden kodra Spas në Budvë dhe Valdanosi në Ulqin.

Sipas kabinetit të Millatoviqit, qëllimi i nismës është që Mali i Zi të përcaktojë qartë se çfarë duhet të mbrojë, ku dhe si mund të zhvillohet, sa mund të përballojë hapësira dhe kush mban përgjegjësi për dëmet ekologjike.

Nisma synon që mbrojtja e natyrës të shoqërohet me rezultate të matshme dhe të ndikojë drejtpërdrejt në cilësinë e jetës së qytetarëve.