Mlladost DG kërkon përjashtimin e arbitrit Beshoviq: ‘Ka pasur synim të vetëdijshëm për të dëmtuar klubin tonë’

Futbollistët e Mlladost DG-së u mposhtën sot në fushën e tyre nga Buduqnosti, me rezultatin 0:2, në raundin e tetë të Meridianbet 1. CFL. Ndeshja e zhvilluar në Podgoricë u vendos nga mysafirët, por vëmendjen kryesore pas bilbilit të fundit e mori arbitri kryesor i takimit, Milosh Beshoviq.

Pas ndeshjes, drejtuesit e klubit shpërndanë një deklaratë për mediat ku shprehën pakënaqësi të madhe për arbitrimin. Sipas Mlladostit, “që nga fillimi i ndeshjes kemi pasur përshtypjen se kriteri i gjykimit nuk ishte i barabartë”, duke veçuar veçanërisht penalltinë e pastër, sipas tyre, të paakordur kur rezultati ishte 0:1 — një vendim që, siç thonë ata, “mund të kishte ndikuar ndjeshëm në rrjedhën e mëtejshme të ndeshjes”.

Klubi thekson se i njëjti arbitër nuk kishte akorduar penallti të qartë në favor të tyre as në ndeshjen kundër Sutjeskës, si dhe përmend penalltinë e padhënë kundër Petrovcit në raundin e katërt. Në deklaratë thuhet: “Nuk duam të merremi me motivet dhe synimet e gjyqtarit, por pas përsëritjes së situatave të tilla, konsiderojmë se ka pasur synim të drejtpërdrejtë për të dëmtuar me vetëdije klubin tonë”.

Për këtë arsye, FK Mlladost DG kërkon përjashtimin e gjyqtarit Milosh Beshoviq nga të gjitha ndeshjet e ardhshme të të gjitha përzgjedhjeve të klubit, duke u kërkuar organeve kompetente të shqyrtojnë seriozisht kërkesën dhe të sigurojnë kushte të barabarta dhe gjykim të paanshëm për të gjitha ekipet.

Burimi: CdM / Vijesti