MOSKË – Vritet gjenerali rus disa javë pasi u nderua me titullin “Hero i Rusisë”

MOSKË, 16 shtator /ATSH-DPA/- Një gjeneral rus është vrarë në luftën në Ukrainë, vetëm dy javë e gjysmë pasi ishte nderuar me titullin “Hero i Rusisë”, bëjnë të ditur blogerë ushtarakë rusë dhe gjenerali çeçen, Apti Alaudinov përmes “Telegram-it”.

Bëhet fjalë për gjeneral-majorin Anton Grunis, komandant i Brigadës së 4-të të Gardës, të këmbësorisë së motorizuar.

Në fillim të korrikut, Grunis i raportoi presidentit rus Vladimir Putin se forcat ruse kishin marrë nën kontroll qytetin Kostjantinivka në lindje të Ukrainës.

“Një burrë me një emër me origjinë letoneze, i lindur në Kazan, po lufton shkëlqyeshëm”, deklaroi Putin në atë kohë.

Megjithatë, sipas zyrtarëve ukrainasë dhe vëzhguesve ushtarakë perëndimorë, qyteti nuk është plotësisht nën kontrollin e forcave ruse.

Më 27 gusht, Grunis u nderua me titullin e lartë “Hero i Rusisë”.

Rrethanat e sakta të vdekjes së gjeneralit nuk janë bërë të ditura.

Ndërkohë, burime në Moskë dhe Kiev, bëjnë të ditur se gjatë fundjavës pati sulme të fuqishme ukrainase ndaj pozicioneve ruse, në territoret e pushtuara të Luhanskut dhe Donetskut.

Sipas shifrave zyrtare, gati 20 gjeneralë rusë janë vrarë që nga fillimi i pushtimit rus të Ukrainës në shkurt 2022.

Ndërkohë, sipas raportimeve që nuk janë konfirmuar zyrtarisht, një gjeneral rus me gradën e gjeneral-lejtnantit u vra në fund të gushtit, kur një qendër komanduese në Donetsk u godit nga zjarri.

Në terminologjinë ushtarake, gjeneral-major është një gradë e lartë ushtarake, ndërsa brigadë është një njësi ushtarake e përbërë nga disa batalione. /