MPB NIS NISMËN PËR RISHIKIMIN E KUFIZIMEVE TË SHPEJTËSISË NË RRUGËT E MALIT TË ZI

_{Foto: Drejtoria e Policisë / Uprava Policije}

Ministria e Punëve të Brendshme (MPB) ka nisur një nismë për analizimin dhe rishikimin e kufizimeve aktuale të shpejtësisë në rrugët e Malit të Zi, me qëllim që ato të përshtaten me gjendjen reale të rrugëve dhe rreziqet e sigurisë në segmente të caktuara.

MPB propozon krijimin e grupeve të përbashkëta të ekspertëve, ku do të përfshihen institucionet përkatëse, specialistë të komunikacionit dhe Universiteti i Malit të Zi.

Në bazë të analizave profesionale dhe treguesve të matshëm do të përcaktohet se në cilat segmente kufizimet duhet të mbahen, rriten apo ulen.

Vëmendje e veçantë do t’u kushtohet rrugëve me numër të lartë aksidentesh, konfiguracion të rrezikshëm, trafik të dendur apo prani të shtuar të këmbësorëve.

Nga MPB theksojnë se qëllimi nuk është rritja e shpejtësisë me çdo kusht, por vendosja e kufizimeve reale, të arsyeshme dhe të bazuara në vlerësimin e rrezikut, në mënyrë që drejtuesit e automjeteve t’i kuptojnë dhe respektojnë më mirë.