Në janar i shpëtoi atentatit, vritet kryebashkiaku i Meksikës. Persona të armatosur sulmuan zyrën e tij

Kryebashkiaku i një qyteti në shtetin e Morelos, në Meksikën qendrore u vra të mërkurën nga persona të armatosur që hynë në ndërtesën e bashkisë. Vrasja erdhi disa muaj pasi ai i mbijetoi një atentati të mëparshëm.

Valentin Lavin Romero, kryebashkiak i Temoac, një qytet me rreth 14,000 banorë, ishte anëtar i partisë në pushtet MORENA, nën drejtimin e presidentes Claudia Sheinbaum. Ai i kishte mbijetuar një atentati të mëparshëm në janar.

Policia gjeti trupin e tij të pajetë brenda objektit të bashkisë. Banda të ndryshme të trafikimit të drogës veprojnë në shtetin e Morelos, i cili kufizohet në veçanti me shtetin e Guerrero, një nga më të dhunshmit në vend.

Pothuajse njëqind zyrtarë të zgjedhur vendorë janë vrarë në Meksikë që nga viti 2006, viti në të cilin shpërtheu dhuna e bandave, veçanërisht në trafikun e drogës.

Vrasja në fund të vitit 2025 e Carlos Manzos, kryetarit të bashkisë së Uruapanit, një qytet me 300,000 banorë në shtetin perëndimor të Michoacanit, tronditi vendin. Zyrtari i zgjedhur u vra para familjes së tij në mes të ditës gjatë një eventi publik.

Autori i dyshuar, një adoleshent 17-vjeçar, u vra nga truprojat e kryetarit të bashkisë, të cilët kishin sfiduar kartelet dhe kishin kërkuar që qeveria federale të mbështeste “luftën” që ai kishte shpallur kundër tyre.