NJU JORK – Pistorius: Gjermania do të vazhdojë të mbështesë misionet paqeruajtëse të OKB-së

NJU JORK, 17 shtator /ATSH-DPA/- Ministri gjerman i Mbrojtjes, Boris Pistorius konfirmoi sot në selinë e Kombeve të Bashkuara në Nju Jork, se Gjermania do të vazhdojë të mbështesë misionet paqeruajtëse të OKB-së.

Pas takimit me sekretarin e përgjithshëm të OKB-së, António Guterres, Pistorius tha se ruajtja e paqes dhe përpjekjet për vendosjen e saj, duhet të mbeten detyrë qendrore e të gjitha vendeve.

Sipas qeverisë gjermane, misionet e OKB-së, janë një nga instrumentet më të rëndësishme për ruajtjen e paqes në zonat e prekura nga krizat dhe konfliktet, pasi ndihmojnë në uljen e dhunës.

Pistorius konfirmoi gjithashtu se Gjermania është e gatshme të angazhohet në misione të tjera të OKB-së edhe pas përfundimit të misionit UNIFIL në Liban.

Misioni UNIFIL, i cili vepron prej gati 50 vitesh, do të përfundojë më 31 dhjetor 2026 dhe më pas do të mbyllet brenda një viti, sipas vendimit unanim të 15 anëtarëve të Këshillit të Sigurimit.

Gjermania, aktualisht kontribuon me më shumë se 200 ushtarë në misionet paqeruajtëse të OKB-së dhe është kontribuuesi i katërt më i madh financiar, për operacionet paqeruajtëse të organizatës. /