Pagat e magjistratëve vijojnë të mos ekzekutohen, reagojnë përsëri gjyqtarët dhe prokurorët

Unioni i Gjyqtarëve, Shoqata Kombëtare e Gjyqtarëve dhe Shoqata e Prokurorëve kanë reaguar lidhur me vijimin e mosekzekutimit të pagave të magjistratëve, funksionarëve të organeve të drejtësisë dhe personelit të administratës gjyqësore e të prokurorisë.

Në një deklaratë të përbashkët, tre organizatat shprehin shqetësimin për mënyrën se si institucionet përgjegjëse po justifikojnë situatën, duke theksuar se Gjykata Kushtetuese i kishte lënë Kuvendit afat deri më 31 korrik 2026 për miratimin e ndryshimeve ligjore.

Sipas tyre, pas përfundimit të këtij afati, KLGJ dhe KLP kanë marrë vendimet përkatëse për konkretizimin e llogaritjes së pagave, në zbatim të mekanizmit të përcaktuar nga Gjykata Kushtetuese.

Organizatat kundërshtojnë kërkesën e Ministrisë së Financave drejtuar KLGJ-së dhe KLP-së për dërgimin e urdhërpagesave sipas formulës së mëparshme. Ato ngrenë pyetjen se mbi çfarë baze ligjore kërkohet zbatimi i një formule që, sipas deklarimeve publike të Ministrit të Drejtësisë, tashmë është shfuqizuar.

Gjyqtarët dhe prokurorët theksojnë se mosveprimi i Kuvendit nuk mund të përdoret për të pezulluar efektet e një vendimi të Gjykatës Kushtetuese. Sipas tyre, nisma e re ligjvënëse e depozituar nga dy deputetë nuk mund të justifikojë bllokimin e pagave dhe ekzekutimi i tyre nuk mund të mbetet në pritje të miratimit të një ligji të ri.

Në deklaratë kërkohet respektimi i vendimit nr. 15/2026 të Gjykatës Kushtetuese dhe ekzekutimi i vendimeve të KLGJ-së dhe KLP-së, për sa kohë ato mbeten akte në fuqi.

Tre organizatat kërkojnë gjithashtu që çdo ndërhyrje e ardhshme ligjore nga Kuvendi të mos prodhojë një rezultat më të pafavorshëm për magjistratët sesa standardi i përcaktuar tashmë nga Gjykata Kushtetuese.