Papa Leo XIV emëron motrën Alessandra Smerilli në krye të Dikasterit për Zhvillimin Integral të Njeriut

Papa Leo XIV njoftoi emërimin e motrës italiane Alessandra Smerilli si drejtore të Dikasterit të Vatikanit për Promovimin e Zhvillimit Integral të Njeriut, institucion që merret me çështjet e migrantëve, mjedisin dhe zhvillimin shoqëror. Smerilli, e cila është ekonomiste dhe deri më tani ka qenë zëvendëse në këtë dikaster, merr detyrën si prefekte.

Sipas Associated Press, ajo zëvendëson kardinalin kanadez Michael Czerny, i cili është në prag të pensionit dhe së shpejti mbush 80 vjeç. Ky është emërimi i parë i rëndësishëm i një gruaje në hierarkinë e Selisë së Shenjtë nga Papa Leo XIV.

Vendimi shihet si vazhdim i politikave të paraardhësit, Papa Françesku, për të fuqizuar prezencën e grave në poste drejtuese brenda Selisë së Shenjtë. Më herët këtë muaj, Papa Leo emëroi gjithashtu Maria Montserrat Alvarado, meksikano-amerikane, në krye të operacioneve të komunikimit të Vatikanit.

Për të adresuar kompleksitetin e postit, Papa Leo caktoi në të njëjtën kohë kardinalin Fabio Baggio si “pro-prefekt” të dikasterit, ndërsa Baggio vazhdon të mbajë funksionin e nënsekretarit. Kardinali mori gjithashtu mandatin për të udhëhequr qendrën mjedisore Borgo Laudato Si në Castel Gandolfo, pranë Romës.

Çështja e roleve drejtuese në Kishë mbetet e ndjeshme, duke pasur parasysh që priftëria institucionalisht rezervon shërbesën për meshkujt dhe shqetësimet e grave për një status të pavlerësuar në strukturat kishtare vazhdojnë të jenë pjesë e debatit, raporton Associated Press.