Prishtinë: Ndërpritet seanca e parë e procesit ndaj 21 serbëve të akuzuar për dëbim të shqiptarëve në luftën e 1999-ës

Gjykata Themelore në Prishtinë ka ndërprerë sot seancën e parë të procesit gjyqësor ndaj 21 serbëve, të akuzuar se janë përgjegjës për dëbimin e më shumë se 800 mijë shqiptarëve gjatë konfliktit në Kosovë në vitin 1999. Arsyeja e ndërprerjes ishte mosdorëzimi në kohë i dosjeve të çështjes te të gjithë avokatët, për çka gjykatësja Medije Bitiçi ndërpreu seancën e parë.

Të akuzuarit — mes tyre Zllatomir Peshiç, Mlladen Çirkoviç, Radomir Markoviç, Dushko Adamoviç dhe 17 të tjerë — përfaqësohen nga avokatë të caktuar sipas detyrës zyrtare, pasi gjykimi zhvillohet në mungesën e tyre. Aktakuza kundër tyre ishte publikuar më 15 gusht 2025, ndërsa Prokuroria e kërkoi gjykimin në mungesë sepse prania e tyre nuk mund të sigurohej gjatë fazës së hetimit.

Prokuroria Speciale i akuzon 21 të pandehurit se kanë ushtruar “pushtet dhe kontroll efektiv” mbi forcat që vepronin nën përgjegjësinë e tyre në zonat e Prishtinës, Mitrovicës, Pejës, Prizrenit, Ferizajt, Gjilanit dhe Gjakovës. Sipas aktakuzës, ata kanë pasur dijeni se nën kontrollin e tyre kryheshin shkatërrim i pronës, djegie shtëpish dhe infrastrukture civile, përndjekje dhe arrestime arbitrare mbi bazë etnike, sulme të armatosura ndaj fshatrave dhe qyteteve të banuara me civilë shqiptarë, me qëllim shpërnguljen me dhunë.

Këto veprime, sipas aktakuzës, “kanë rezultuar me organizimin e kolonave të detyruara të civilëve shqiptarë me qëllim deportimin nga Kosova drejt Shqipërisë dhe Maqedonisë”, duke arritur në 862.979 civilë të dëbuar. 21 të akuzuarit ngarkohen për veprën penale “krim lufte kundër popullsisë civile” nga neni 142 i Kodit Penal të RSFJ-së.

Burimi: RTS