Pupovac për ‘Vijesti’: Mandiq duhet të shlyejë gabimin për ngushëllimin Mlladiqëve

Ngushëllimi që kryetari i Kuvendit të Malit të Zi, Andrija Mandiq (NSD), i dërgoi për vdekjen e kriminelit të luftës Ratko Mlladiq, bie ndesh me rolin që Mandiq luan aktualisht në skenën politike — si pjesë e shumicës qeverisëse që duhet ta fusë Malin e Zi në Bashkimin Evropian dhe të ruajë unitetin demokratik e politik të vendit pas viteve të përçarjes.

Për këtë arsye, së pari Mandiq, e pastaj edhe të tjerët, duhet të gjejnë mënyrën për të anuluar pasojat e veprimit të tij — i tha “Vijestive” deputeti në Saborin kroat dhe kryetari i Partisë së Pavarur Demokratike Serbe, Milorad Pupovac, në një intervistë me shkrim.

Pupovac, një nga të paktët politikanë serbë që dënuan lavdërimin e Mlladiqit, tha se rastet e festimit të kriminelëve të luftës si heronj po ndodhin për shkak të dobësimit të mekanizmave të drejtësisë ndërkombëtare dhe shtimit të politikanëve e politikave që rehabilitojnë krimet e tyre — “një trend shumë i papërgjegjshëm dhe i rrezikshëm i kthimit drejt luftërave”.

Duke folur për kërkesën e ish-kryeministres kroate Jadranka Kosor që Kroacia të bllokojë rrugën evropiane të Malit të Zi për shkak të telegramit të Mandiqit, Pupovac u shpreh se nuk e konsideron të arsyeshme bllokimin — ashtu si nuk e kishte konsideruar të pranueshëm bllokimin slloven të Kroacisë në të kaluarën — duke shtuar se bllokimet e ndërsjella të ish-republikave jugosllave janë joevropiane në motiv dhe e kontaminojnë politikën evropiane me fantazmat e luftës.

Ai vlerësoi pozitivisht faktin që shumica e politikanëve serbë në Mal të Zi kanë marrë përgjegjësi për të ardhmen evropiane dhe unitetin politik të vendit, dhe tha se serbët në Mal të Zi e kanë qendrën e tyre në Podgoricë, ashtu si serbët në Kroaci në Zagreb.

Burimi: Vijesti