PUSHTETI DHE OPOZITA DISKUTOJNË NDRYSHIMET KUSHTETUESE NË DELEGACIONIN E BE-së

_{Foto: Kuvendi i Malit të Zi / Skupština Crne Gore}

Përfaqësues të pushtetit dhe opozitës u takuan sot në Delegacionin e Bashkimit Evropian në Mal të Zi, ku diskutuan propozimin për ndryshime kushtetuese të dorëzuar nga Qeveria në Kuvend.

Ndryshimet parashohin futjen e një verifikimi të detyrueshëm paraprak të integritetit të mandatarit dhe kandidatëve për anëtarë të Qeverisë.

Në takim morën pjesë edhe diplomatë evropianë, përfaqësues të klubeve parlamentare, zëvendëskryeministri për drejtësinë, sistemin politik dhe luftën kundër korrupsionit, Momo Koprivica, si dhe ministri i Drejtësisë, Bojan Bozhoviq.

Sipas informacioneve të Portalit RTMZ, u diskutua për zgjidhje konkrete që duhet të përmirësohen, por nuk është arritur ndonjë marrëveshje konkrete.

Takimi u cilësua si pjesë e konsultimeve të rregullta me përfaqësuesit e BE-së, ndërsa u theksua rëndësia e ndryshimeve kushtetuese në kohën kur Mali i Zi po hyn në fazën përfundimtare të negociatave për anëtarësim në BE.