Rama mbështet ish-krerët e UÇK-së në Hagë: Thaçi do të triumfojë me forcën e së vërtetës

Kryeministri Edi Rama ka reaguar në rrjetet sociale në lidhje me procesin gjyqësor ndaj ish-krerëve të Ushtrisë Çlirimtare të Kosovës në Hagë, teksa gjyqi ndodhet në fazën përfundimtare.

Rama e ka cilësuar situatën si një “farsë” dhe ka shprehur mbështetjen e tij për ish-presidentin e Kosovës, Hashim Thaçi, duke deklaruar se ai do të triumfojë përmes së vërtetës.

Në reagimin e tij, kryeministri shqiptar shkruan se, pavarësisht zhvillimeve të ditëve të fundit, liria dhe e vërteta do të triumfojnë.

“Farsa është në ditët e fundit dhe gjithçka pret njeriu nga autorët e saj, por siç e ka thënë vetë Hashimi, lirinë nuk ia merr dot askush, askund. E ashtu siç Kosova triumfoi duke besuar te liria edhe kur s’kishte askënd e asgjë përpos etjes së vet për liri, ashtu do të triumfojë edhe Hashim Thaçi me forcën e të vërtetës së tij, të cilën vitet e burgut veç e kanë bërë më të madhe bashkë me mbështetjen e krejt shqiptarisë”, shprehet Rama.

Procesi ndaj ish-krerëve të UÇK-së po zhvillohet në Dhomat e Specializuara të Kosovës në Hagë.