Rama publikon pamje nga Shkodra e mbushur me turistë: Mëngjes i zakonshëm për qytetin

Kryeministri Edi Rama ka ndarë në rrjetet sociale disa fotografi që tregojnë turistë dhe vizitorë duke shëtitur e eksploruar bukuritë e Shkodrës, një prej destinacioneve më të frekuentuara turistike në vend gjatë sezonit veror.

Në postimin e publikuar në Facebook, Rama shprehet se prania e madhe e vizitorëve është kthyer tashmë në një realitet të përditshëm për qytetin verior.

Shkodra vijon të jetë një nga destinacionet më të preferuara si për turistët e huaj, ashtu edhe për vizitorët vendas. Pozicioni i saj gjeografik, trashëgimia kulturore, Kalaja e Rozafës, liqeni i Shkodrës dhe afërsia me Alpet Shqiptare e kanë bërë qytetin një ndalesë të rëndësishme në itineraret turistike.

Postimi i kryeministrit vjen në një periudhë kur fluksi i turistëve në vend mbetet i lartë, ndërsa autoritetet kanë theksuar se Shqipëria po regjistron një sezon turistik me vizitorë nga një numër gjithnjë e më i madh shtetesh.