Raporti, vajzat e reja më të ekspozuara se djemtë ndaj gjuhës së urrejtjes

Rrjetet sociale janë kthyer në një nga hapësirat ku përhapen më shpesh mesazhet e urrejtjes dhe përmbajtjet fyese. Të dhënat më të fundit të Eurostat tregojnë se të rinjtë janë grupi më i ekspozuar ndaj këtij fenomeni, ndërsa edhe Shqipëria vijon të përballet me sfida në luftën kundër gjuhës së urrejtjes, veçanërisht në internet.

Sipas Eurostat, gjatë vitit 2025, 54% e përdoruesve të internetit të moshës 25-34 vjeç dhe 53.7% e atyre 16-24 vjeç kanë parë mesazhe armiqësore ose poshtëruese të drejtuara ndaj individëve apo grupeve të caktuara. Me rritjen e moshës kjo përqindje bie, duke zbritur në 28.1% tek personat 65-74 vjeç.

Të dhënat tregojnë gjithashtu se vajzat janë më të ekspozuara se djemtë. Në grupmoshën 16-24 vjeç, 57.2% e vajzave deklaruan se kishin hasur gjuhë urrejtjeje në internet, kundrejt 50.4% të djemve. Mesazhet më të shpeshta lidhen me pikëpamjet politike ose shoqërore, origjinën racore apo etnike, orientimin seksual dhe gjininë.

Edhe në Shqipëri, gjuha e urrejtjes vazhdon të mbetet një problem. Sipas raportit të Komisionit Europian për Shqipërinë, megjithëse legjislacioni është në përputhje me standardet europiane, zbatimi i tij mbetet sfidë. Gjatë vitit 2024, Komisioneri për Mbrojtjen nga Diskriminimi trajtoi 12 raste të gjuhës së urrejtjes, ndërsa në gjashtëmujorin e parë të vitit 2025 u regjistruan edhe 11 raste të reja. Në të njëjtën kohë, policia raportoi 7 raste të krimeve të urrejtjes në vitin 2024 dhe 8 raste vetëm në gjysmën e parë të vitit 2025.

Një raport monitorimi mbi gjuhën e urrejtjes në Shqipëri tregon se gjatë periudhës janar 2024 – qershor 2025 u identifikuan 96 raste të gjuhës diskriminuese dhe të urrejtjes në media dhe platformat online. Më të shpeshtat ishin sulmet ndaj grave dhe vajzave.