RIGË – Lituania: Rusia mund të përdorë dronë ukrainas për një operacion të rremë

RIGË, 6 gusht /ATSH-DPA/- Shërbimet e inteligjencës ushtarake të Lituanisë, kanë të dhëna se Rusia mund të jetë duke shqyrtuar mundësinë e sulmeve ndaj infrastrukturës kritike në vendet baltike, duke përdorur dronë ukrainas, të kapur për të fshehur origjinën e sulmit.

Ministri lituanez i Mbrojtjes, Robertas Kaunas, tha se Rusia mund të kryejë sulme të tipit “operacion me flamur të rremë”, ku përdoret një mjet i manipuluar ose i atribuohet një pale tjetër për të fshehur autorin e vërtetë.

Sipas tij, skenari më i mundshëm që po shqyrtohet, është përdorimi i dronëve ukrainas të kapur nga Rusia, për të krijuar përshtypjen se sulmi është kryer nga Ukraina dhe për të shmangur përgjegjësinë.

Ministri nuk dha detaje mbi objektivat e mundshme apo afatet kohore, por theksoi se nuk ka një vendim konkret nga Rusia, për të kryer një operacion të tillë dhe nuk ka rrezik të menjëhershëm për një sulm.

Lituania dhe vendet e tjera të NATO-s po monitorojnë aktivitetet e Rusisë dhe kanë rritur masat e sigurisë në objektet kryesore të transportit dhe energjisë. /

Lituania, e cila kufizohet me enklavën ruse të Kaliningradit dhe Bjellorusinë aleate të Moskës, e ka ndjerë veçanërisht kërcënimin që prej pushtimit rus të Ukrainës.