Robbie Williams zbulon betejën me autizmin dhe Tourette

Robbie Williams ka zbuluar se është diagnostikuar me autizëm.

Sipas një raporti të publikuar më 13 gusht nga Daily Mail, ish-anëtari i Take That tha gjatë prezantimit të koleksionit të ri të markës së tij të veshjeve Hopeium se ka “pak autizëm” dhe se mendja e tij shpesh e çon drejt skenarëve ekstremë.

Këngëtari 52-vjeçar, i cili ka folur më parë edhe për ADHD-në, tregoi se ka mësuar ta përdorë krijimtarinë si mënyrë për t’u përballur me këto mendime.

“Me ADHD mund të përqendrohesh 1000% te një gjë, por për gjithçka tjetër nuk arrin dot. Pyesni fëmijët e mi,” tha ai.

Williams shpjegoi se është i fiksuar pas krijimit të imazheve dhe gjërave qesharake, sepse kur është duke krijuar, nuk mendon për veten dhe ankthin e tij.

Ai dha edhe një shembull të pazakontë, duke treguar se gjatë një udhëtimi me avion i kishte shkuar në mendje: “Po sikur të kem “telekinesis”, dhe mendimet e mia ta bëjnë avionin të rrëzohet?”

“Kjo është niveli i çmendurisë me të cilin përballem. Është më mirë ta stërvit trurin të bëjë diçka më të dobishme sesa të shqetësohet për fuqi mbinatyrore dhe rrëzimin e një avioni,” u shpreh ai.

Më herët, në vitin 2025, Williams kishte zbuluar se vuan nga sindroma Tourette, duke thënë se tek ai tiket nuk shfaqen fizikisht, por manifestohen si mendime ndërhyrëse.