Rriten çmimet në Vlorë, blerësit: Rrogat dhe pensionet mbeten në vend

Sezoni veror dhe rritja e kërkesës, kryesisht nga turistët e huaj, kanë sjellë një tjetër rritje të çmimeve të frutave, perimeve dhe produkteve të shportës në Vlorë.

Për blerësit, situata është bërë e vështirë për t’u përballuar. Ata kërkojnë më shumë kontroll mbi çmimet, pasi sipas tyre, ato vijojnë të rriten, ndërsa rrogat dhe pensionet mbeten në të njëjtin nivel.

Për shkak të çmimeve të larta, blerësit thonë se janë detyruar të reduktojnë sasinë e produkteve që marrin. Në vend të blerjeve të zakonshme, shumë prej tyre thonë se blejnë vetëm sasi të vogla, madje edhe me kokrra, aq sa u nevojitet për përdorim personal.

Por situata nuk është e lehtë as për tregtarët. Ata thonë se fuqia e ulët blerëse po ndikon drejtpërdrejt në shitje, pasi qytetarët blejnë më pak dhe, për pasojë, edhe xhiroja e bizneseve ka rënë.

Sipas tregtarëve, rritja e çmimeve nis që te furnitorët. Produktet blihen me kosto më të lartë dhe, pasi u shtohet marzhi i fitimit, çmimi final për konsumatorin rritet edhe më tej.

Në këtë situatë, çmimet e larta po rëndojnë njëkohësisht mbi familjet që blejnë dhe tregtarët që përpiqen të shesin, duke e bërë më të vështirë përballimin e shpenzimeve të përditshme.