Rubio takon Papa Leon në Vatikan pas sulmeve të Trump

Sekretari i Shtetit i SHBA-së, Marco Rubio këtë të enjte zhvilloi një takim me Papa Leo XIV, në mes të një periudhe tensionesh midis Uashingtonit dhe Vatikanit.

Vizita e Rubios vjen pas kritikave të jashtëzakonshme të Presidentit Donald Trump ndaj Papës, të cilat erdhën pasi Papa shprehu kundërshtimin e tij ndaj operacionit ushtarak amerikan në Iran.

Leo gjithashtu ka vazhduar të flasë për interesat e refugjatëve dhe emigrantëve, në kontrast të thellë me administratën Trump.

Aeroplani i Rubios u ul në Romë të enjten në mëngjes, gjithashtu në prag të përvjetorit të parë të Leos si Papë, përpara se sekretari i shtetit të nisej për në Pallatin Apostolik, rezidencën zyrtare të Papës, ku u zhvillua takimi.

Përpara largimit të tij, diplomati më i lartë amerikan hodhi poshtë idenë se takimi me Papa Leon është një përpjekje për të rivendosur marrëdhëniet diplomatike me Vatikanin, tek i cili SHBA-të janë mbështetur si një partner humanitar për vite me radhë. Ai pranoi, megjithatë, se ka shumë për të folur me Vatikanin, përfshirë Kubën.

“Udhëtimi nuk është i lidhur me asgjë tjetër përveç faktit se do të ishte normale për ne të angazhoheshim me ta”, tha Rubio në një konferencë shtypi në Shtëpinë e Bardhë të martën.

Pas takimit, Rubio pritet të takohet edhe me zyrtarë të tjerë të lartë të Vatikanit, përfshirë Kardinalin Pietro Parolin, Sekretarin e Shtetit të Selisë së Shenjtë.

Ky shënoi takimin e dytë midis Rubios, i cili është një katolik i devotshëm dhe takimin e parë të njohur midis një anëtari të administratës dhe Leos në pothuajse një vit. Rubio dhe zëvendëspresidenti JD Vance u takuan me të pas meshës së inaugurimit të tij vitin e kaluar.