RUSI – Kremlini: Sanksionet e reja amerikane do t’i komplikonin përpjekjet për paqe në Ukrainë

MOSKË, 17 shtator /ATSH -AA- Sanksionet e reja të SHBA-së ndaj Rusisë do t’i komplikonin përpjekjet për arritjen e një zgjidhjeje paqësore në Ukrainë nëse zbatohen, tha sot zëdhënësi i Kremlinit, Dmitry Peskov.

Komentet e tij erdhën pasi Dhoma e Përfaqësuesve e SHBA-së miratoi të mërkurën një paketë sanksionesh që synon ekonominë ruse dhe kërcënon me tarifa të larta blerësit kryesorë të naftës ruse.

Projektligji tani pret nënshkrimin e presidentit amerikan Donald Trump për të hyrë në fuqi.

Duke folur në një konferencë për media në Moskë, Peskov e cilësoi miratimin e projektligjit si “veprim jomiqësor” dhe tha se Kremlini po e monitoron ecurinë e tij.

“Sigurisht, vendosja e çdo sanksioni shtesë nga SHBA-ja do t’i komplikonte patjetër përpjekjet për gjetjen e një zgjidhjeje paqësore në Ukrainë”, tha ai.