Sala: 8.9 miliardë lekë më shumë për buxhetin e shëndetësisë. Investime për…

Ministrja e Shëndetësisë, Evis Sala, ka bërë me dije përmes një postimi në rrjetin social Facebook se buxhetit të shëndetësisë dhe mirëqenies sociale për vitin 2026 i janë shtuar 8.9 miliardë lekë më shumë krahasuar me parashikimin fillestar për të njëjtin vit.

Sipas ministres, kjo përbën rritjen më të madhe të buxhetit të Ministrisë së Shëndetësisë dhe Mbrojtjes Sociale.

“Mirëmëngjes me lajmin e mirë se 8.9 miliardë lekë më shumë i shtohen buxhetit të shëndetësisë dhe mirëqenies sociale për vitin 2026, krahasuar me parashikimin fillestar për të njëjtin vit, duke shënuar rritjen më të madhe për buxhetin e MSHMS-së”, shkruan Sala.

Ajo thekson se rritja e buxhetit për shëndetësinë dhe mirëqenien sociale përfaqëson një investim të drejtpërdrejtë te qytetari, duke synuar përmirësimin e cilësisë së shërbimeve shëndetësore dhe garantimin e një të ardhmeje më të sigurt për çdo familje.