SHBA – Trump: Marrëveshja bërthamore civile me Arabinë Saudite e kushtëzuar nga njohja e Izraelit nga Riadi

UASHINGTON, 23 korrik /ATSH-AFP-DPA/ – Presidenti amerikan, Donald Trump njoftoi sot në rrjetin e tij Truth Social se marrëveshja bërthamore civile midis Shteteve të Bashkuara dhe Arabisë Saudite është plotësisht e kushtëzuar nga ratifikimi i Marrëveshjeve të Abrahamit nga mbretëria duke njohur kështu Shtetin e Izraelit.

“Marrëveshja bërthamore civile (…) që aktualisht po finalizohet midis Departamentit të Energjisë të Shteteve të Bashkuara dhe Arabisë Saudite (…) do të miratohet, por është plotësisht e kushtëzuar nga respektimi i Arabisë Saudite ndaj Marrëveshjeve të Abrahamit shumë të respektuara dhe të suksesshme”, deklaroi presidenti amerikan.

Të nënshkruara në vitin 2020 nën kujdesin e Donald Trump gjatë mandatit të tij të parë, këto marrëveshje ekonomike, tregtare dhe sigurie çuan në normalizimin e marrëdhënieve midis Izraelit dhe tre vendeve arabe, Emirateve të Bashkuara Arabe, Bahrejnit dhe Marokut.

Shtetet e Bashkuara të Amerikës dhe Arabia Saudite kanë nënshkruar një marrëveshje historike për bashkëpunim në fushën e energjisë bërthamore civile, duke hapur rrugën për zhvillimin e programit bërthamor civil të mbretërisë saudite.

Departamenti amerikan i Energjisë njoftoi  dje se sekretari i Energjisë, Chris Wright, dhe ministri saudit i Energjisë, princi Abdulaziz bin Salman, firmosën marrëveshjen për bashkëpunim paqësor bërthamor, të njohur si “Marrëveshja 123”, së bashku me një marrëveshje dypalëshe për masat mbrojtëse.

Sipas Departamentit të Energjisë, këto marrëveshje krijojnë bazën ligjore për një partneritet shumëvjeçar me vlerë disa miliarda dollarë, që synon të avancojë objektivat ekonomike dhe strategjike të të dy vendeve, përfshirë edhe parandalimin e përhapjes së armëve bërthamore.

Shtetet e Bashkuara të Amerikës presin të përfitojnë ekonomikisht përmes eksportit të teknologjisë bërthamore dhe krijimit të vendeve të reja të punës, ndërsa Arabia Saudite synon të plotësojë nevojat e saj në rritje për energji përmes zhvillimit të një programi bërthamor civil.

Marrëveshja do t’i dërgohet tani Kongresit amerikan për shqyrtim, ku pritet të përballet me debat dhe mund të hasë kundërshtime nga disa ligjvënës./  a.jor.