Sot Konferenca Ndëqeveritare në Bruksel mbi finalizimin e “Themeloreve”, Rama në Bruksel

Shqipëria dhe Bashkimi Evropian zhvillojnë këtë të martë në Bruksel Konferencën e 8-të Ndërqeveritare, një takim që konsiderohet kyç për vijimin e procesit të integrimit të vendit në familjen evropiane.

Takimi vjen në një moment të rëndësishëm për negociatat, pas përmbushjes nga Shqipëria të objektivave të ndërmjetme për grupkapitullin “Themeloret”, i cili përfshin çështje që lidhen me shtetin e së drejtës, drejtësinë dhe funksionimin e institucioneve demokratike.

Në fokus të konferencës pritet të jenë përcaktimi i hapave përmbyllës për Kapitullin 23, që lidhet me gjyqësorin dhe të drejtat themelore, si dhe Kapitullin 24, që trajton drejtësinë, lirinë dhe sigurinë. Po ashtu, diskutimet do të prekin reformën në administratën publike dhe kriteret ekonomike që lidhen me standardet e BE-së.

Delegacioni shqiptar do të drejtohet nga kryeministri Edi Rama, i shoqëruar nga përfaqësues të ekipit negociator. Konferenca pritet të nisë në orën 19:30 në Bruksel.

Ky zhvillim pason një seri takimesh ndërqeveritare mes Shqipërisë dhe BE-së, gjatë të cilave janë hapur disa grupkapituj negociues, përfshirë tregun e brendshëm, konkurrueshmërinë, axhendën e gjelbër, bujqësinë dhe marrëdhëniet e jashtme.

Konferenca e tetë shihet si një test i rëndësishëm për ecurinë e reformave dhe për ritmin me të cilin Shqipëria do të avancojë në fazat e ardhshme të negociatave për anëtarësim në Bashkimin Evropian.