Spajiç dhe Merc hapin Samitin e Liderëve të Procesit të Berlinit në Sveti Stefan

Samiti i Liderëve të Procesit të Berlinit do të mbahet më 21 dhe 22 tetor në Sveti Stefan. Vendimi u mor në mbledhjen e Qeverisë, njoftoi Milica Perišić, këshilltare e kryeministrit dhe koordinatore kombëtare për Procesin e Berlinit.

Samitin do ta hapin kryeministri Milojko Spajiç dhe kancelari gjerman Friedrich Merz. Bëhet fjalë për një ngjarje të nivelit më të lartë, e cila kurorëzon presidencën e Malit të Zi me Procesin e Berlinit, dhe që do të mbledhë liderët e vendeve të Ballkanit Perëndimor, shtetet e Procesit të Berlinit, zyrtarë të lartë të Bashkimit Evropian dhe përfaqësues të organizatave ndërkombëtare.

Ky samit vjen pas Samitit BE–Ballkan Perëndimor që u mbajt në qershor në Podgoricë dhe është një tjetër dëshmi e gatishmërisë së administratës për organizimin e ngjarjeve të nivelit më të lartë, si dhe e përkushtimit të saj ndaj integrimit evropian të vendit.

Në prag të samitit do të mbahen disa takime ministrore: ministrat e mjedisit mblidhen sot, më 18 shtator, në Zhabljak; ministrat e rinisë mblidhen më 22 dhe 23 shtator në Podgoricë; ministrat e ekonomisë më 30 shtator në Cetinje; ministrat e punëve të jashtme ditën pasardhëse në Budvë; ndërsa ministrat për romët mblidhen më 8 tetor në Podgoricë.

Takimi i ministrave të administratës publike do të mbahet më 13 dhe 14 tetor në kuadër të Samitit Dixhital, ndërsa më 12 deri më 14 tetor do të organizohet në Podgoricë edhe një konferencë shkencore, së bashku me ministrin e arsimit, shkencës dhe inovacionit.

Burimi: Vijesti