Spajiç falënderon kampionin e boksit Usyk: “Bota dëgjoi sa të bukur vend kemi”

Kryeministri i Malit të Zi, Milojko Spajiç, e ka falënderuar publikisht boksierin ukrainas Oleksandr Usyk për qëndrimin e tij ndaj Malit të Zi dhe fjalët e mira për vendin. Në një postim në X, Spajiç e quajti Usykun kampionin e padiskutueshëm botëror të boksit dhe një simbol të shpirtit të pathyeshëm ukrainas, madhështia e të cilit shkon përtej sportit.

“Faleminderit, Usyk, që bëre që e gjithë bota të dëgjojë sa të bukur vend kemi! Mali i Zi i çmon njerëzit që e respektojnë, e duan dhe e përfaqësojnë me krenari”, shkroi kryeministri malazez.

Postimi i Spajiçit vjen pas vlerësimeve të boksierit për Malin e Zi, të cilat kanë gjetur jehonë të gjerë. Usyk, një nga emrat më të mëdhenj të boksit botëror sot, njihet jo vetëm për sukseset në ring, por edhe për mesazhet e tij publike për vendin e tij, Ukrainën, në kohë lufte.

Vlerësimi i kryeministrit për gjestin e sportistit u prit me komente pozitive në rrjetet sociale, ku ndjekësit e përshëndetën miqësinë mes kampionit ukrainas dhe publikut malazez.

Boksieri ukrainas Oleksandr Usyk (Foto: Gabriel Hutchinson, licencë CC BY-SA 4.0)

Burimi: RTCG