Studimi: Ja sa miliona jetë mund të shpëtojë një taksë 3% mbi pasurinë e miliarderëve

Një taksë prej 3% mbi pasurinë e miliarderëve mund të shpëtojë deri në 29.5 milionë jetë deri në vitin 2030. Ky është përfundimi i një studimi të ri të publikuar në revistën prestigjioze “The Lancet”, në një kohë kur ndihma ndërkombëtare për vendet më të varfra po shkurtohet ndjeshëm.

Studiuesit paralajmërojnë se shkurtimet e ndihmës ndërkombëtare për vendet me të ardhura të ulëta dhe të mesme mund të kenë pasoja të rënda.

Nëse këto shkurtime vazhdojnë, deri në vitin 2030 mund të shkaktohen rreth 7.6 milionë vdekje, prej të cilave 1.4 milionë fëmijë nën moshën 5 vjeç.

Por, sipas modelimeve të studimit, një pjesë e këtij hendeku financiar mund të mbulohej përmes taksimit të pasurisë.

Një taksë prej 1% mbi pasurinë e miliarderëve do të mund të shmangte rreth 15.1 milionë vdekje, ndërsa një taksë globale mbi transaksionet financiare do të mund të shmangte rreth 24.5 milionë.

Studiuesit theksojnë se këto janë vlerësime të bazuara në modele dhe jo parashikime të sigurta.