Të shtëna me armë zjarri ndaj një servisi celularësh në Babrru, kapet i dyshuari 18-vjeçar

Një ngjarje me armë zjarri është regjistruar mbrëmjen e së premtes në Babrru, në territorin e Komisariatit të Policisë Kamëz.

Sipas informacionit paraprak, rreth orës 20:25, dyshohet se është qëlluar me armë zjarri në drejtim të një subjekti të mbyllur, konkretisht një servisi celularësh. Pas të shtënave, autori i dyshuar është larguar nga vendi i ngjarjes.

Menjëherë pas njoftimit, shërbimet e Policisë kanë shkuar në vendngjarje dhe kanë nisur ndjekjen e autorit të dyshuar. Rreth 3 kilometra larg vendit të ngjarjes, uniformat blu kanë bërë të mundur kapjen dhe shoqërimin e shtetasit me iniciale R. M., rreth 18 vjeç, për veprime të mëtejshme procedurale.

Grupi hetimor vijon punën për sqarimin e plotë të rrethanave të ngjarjes dhe dokumentimin ligjor të saj. Policia bën me dije se në përfundim të hetimeve do të japë një njoftim më të plotë lidhur me rastin.