Tragjedi në jug të Kretës: 12 emigrantë gjenden të vdekur në një varkë, 105 të shpëtuar në tri operacione

Herët të hënën, më 9 nëntor, Roja Bregdetare greke, siç njofton Reuters, nxori trupat e 12 emigrantëve nga një varkë që lundronte në jug të ishullit të Kretës.

Varka u zbulua 15 milje detare në jug të Kaloi Limenes nga një anije kontejnerësh me flamur të Marokut që kalonte aty pranë. Sipas raportimit të ERT-së, të cituar nga Hellas Journal, një anije e Rojës Bregdetare shpëtoi 18 persona dhe nxori 12 trupat, duke u drejtuar drejt portit të Agia Galinit. Operacioni u koordinua nga qendra e kërkim-shpëtimit EKSED.

Në dy operacione të tjera gjatë së njëjtës natë në jug të Kretës, me ndihmën e mjeteve ajrore të Frontex-it — një avion dhe një dron — u gjetën edhe dy varka: njëra me rreth 47 persona, 30 milje detare në jug të Kaloi Limenes, dhe tjetra me rreth 40 persona, 31 milje në juglindje. Ata u morën nga anijet e Frontex-it për t’u çuar në Kaloi Limenes.

Bilanci i përgjithshëm i tri operacioneve, siç njoftojnë Reuters dhe ERT, është 105 persona të shpëtuar dhe 12 të vdekur. Sipas ERT-së, kushtet e motit në zonë ishin të mira.