Trump bisedon me telefon me presidentin e Jemenit për Hutit, por nuk premton mbështetje ushtarake — zbulon Reuters

Presidenti amerikan Donald Trump ka biseduar të dielën me telefon me presidentin e Jemenit, Rashad al-Alimi, për avancimin e Huthive të mbështetur nga Irani pranë rrugës detare jetike — por nuk ka dhënë asnjë premtim për mbështetje ushtarake, raporton Reuters duke cituar katër burime që njohin situatën.

Al-Alimi i kërkoi Shteteve të Bashkuara mbështetje për qeverinë e tij të mbështetur nga Arabia Saudite në luftën kundër Huthive, të cilët këtë muaj kanë marrë nën kontroll zona kyçe përgjatë ngushticës Bab al-Mandeb, pas një ofensive rrufe, thuhet në raportim.

Megjithatë, dy nga burimet — një zyrtar jemenas dhe një burim perëndimor — i thanë Reuters se Trump nuk bëri ndonjë premtim të drejtpërdrejtë për mbështetje ushtarake gjatë bisedës telefonike.

As Shtëpia e Bardhë dhe as ministri i informacionit i Jemenit nuk iu përgjigjën kërkesave të Reuters për koment mbi bisedën.

Trump ka thënë publikisht se Shtetet e Bashkuara janë në kontakt me Hutit dhe se grupi ka deklaruar se nuk do të sulmojë anijet amerikane. Uashingtoni e ka shpallur grupin rebel organizatë terroriste.

Sipas Reuters, Trump ka refuzuar më herët edhe kërkesat saudite për mbështetje ushtarake kundër Huthive.

Biseda vjen teksa lufta e SHBA-së dhe Izraelit me Iranin hyn në muajin e shtatë, ndërsa sulmet e Huthive ndaj Arabisë Saudite po e zgjerojnë frontin e konfliktit.

Burimi: Reuters