Uganda mbyll kufirin me Kongon, shkak rastet në rritje me Ebola

Uganda urdhëroi të mërkurën mbylljen e kufirit të saj me Kongon, ku rastet e dyshuara të një lloji të rrallë të Ebolës po shtohen.

Masa nënvizon frikën në rritje të përhapjes së virusit në Afrikën Lindore nga Bundibugyo, një lloj i rrallë i virusit Ebola që qëndron pas kësaj shpërthimi dhe që nuk ka ilaçe ose vaksina të miratuara.

Ashtu si Kongo, Uganda është përballur me shpërthime të Ebolës në të kaluarën. Një grup pune lokal ugandas mori vendimin për mbylljen e kufirit. Punonjësit e shëndetësisë ugandas u ekspozuan ndaj virusit nga pacientë kongolezë që kishin kaluar kufirin përpara se shpërthimi të shpallej në Kongon lindore më 15 maj.

“Mbyllja e kufirit ishte e përkohshme, me efekt të menjëhershëm”, u tha gazetarëve Dr. Diana Atwine nga Ministria e Shëndetësisë e Ugandës.

Kalimet kufitare do të autorizohen vetëm në raste emergjente, duke përfshirë reagimin ndaj shpërthimit, arsye humanitare, të ngarkesave ose të sigurisë, shtoi ajo. Kushdo që hyn nga Kongo në rrethana emergjente do të vendoset në izolim të detyrueshëm për 21 ditë.

Numri i rasteve të dyshuara në Kongon lindore po i afrohet 1,000 me të paktën 220 vdekje të dyshuara. Ministria e shëndetësisë e Kongos tha të martën se janë konfirmuar 101 raste dhe po shqyrtohen mbi 3,000 kontakte të mundshme.

Të mërkurën, autoritetet kongoleze thanë se personi i parë që u shërua nga virusi Bundibugyo është liruar në shtëpi nga një qendër trajtimi në Rwampara, një nga qytetet në Kongon lindore në zemër të shpërthimit.

OBSH-ja ka dekurajuar mbylljen e kufijve me Kongon, ndërkohë që pranon se vendet fqinje janë në rrezik të lartë përhapjeje të sëmundjes. Agjencia e shëndetësisë e OKB-së e ka shpallur këtë shpërthim një emergjencë të shëndetit publik me shqetësim ndërkombëtar.