Vala ekstreme e të nxehtit përfshin Spanjën dhe pjesë të Europës, temperatura rekord në maj

Një valë ekstreme të nxehti ka përfshirë Spanjën dhe një pjesë të madhe të Europës, duke sjellë temperatura rekord për muajin maj.

Sipas meteorologëve, shkaku kryesor është një fenomen i njohur si “kupola e nxehtësisë”, një sistem i fuqishëm presioni që bllokon ajrin dhe rrit temperaturat në nivele të pazakonta për këtë periudhë të vitit.

Në shumë zona të Spanjës, temperaturat kanë arritur deri në 39 dhe 40 gradë Celsius.

Situata është shqetësuese edhe në veri të vendit, ku zakonisht temperaturat janë më të ulëta. Në Bilbao dhe rajone të tjera veriore po regjistrohen vlera rekord për muajin maj.

Vala e të nxehtit ka përfshirë edhe vende të tjera europiane. Në Britaninë e Madhe janë thyer rekorde historike temperaturash, ndërsa në Francë autoritetet kanë shpallur alarm në disa rajone për shkak të temperaturave ekstreme.

Mediat franceze raportojnë edhe viktimat e para të lidhura me të nxehtin, ku dy persona kanë humbur jetën gjatë aktiviteteve sportive.

Ekspertët paralajmërojnë se netët kur temperaturat nuk zbresin nën 20 gradë përbëjnë një rrezik serioz për shëndetin, sidomos për të moshuarit dhe personat me sëmundje kronike.

Sipas specialistëve të klimës, episode të tilla po bëhen gjithnjë e më të shpeshta për shkak të ndryshimeve klimatike globale.