Yamal: Franca nuk është superiore, mendoj që Spanja do të fitojë Kupën e Botës

Sulmuesi i kombëtares spanjolle, Lamine Yamal, ka deklaruar se është në formë fizike “shumë të mirë” përpara ndeshjes së nesërme të Kupës së Botës kundër Austrisë.

“Ndihem shumë mirë dhe plot entuziazëm. Kemi parë disa ekipe të mëdha kombëtare të eliminohen dhe jemi plot shpresë tani. Jam në rreth 80-90% formë fizike. Jam gati të luaj 90 minuta kundër Austrisë”, siguroi numri 10 i Barcelonës në një intervistë radiofonike me Cadena Cope.

Duke iu drejtuar kritikave të medias në lidhje me stilin e lojës së ekipit kombëtar, Yamal vuri në dukje se “gjëja e rëndësishme është të fitosh. Natyrisht, duhet të luash mirë, por nëse luan mirë dhe humbet, të gjithë largohemi duke u ndjerë të trishtuar”, shtoi ai.

“Është e vërtetë që mund të përmirësohemi, sepse jemi shumë më mirë se niveli që po tregojmë aktualisht”.

Lidhur me ekipet që garojnë për Kupën e Botës, sulmuesi katalanas deklaroi se nuk e sheh asnjë ekip kombëtar si “të pamundur për t’u mposhtur”. “As Franca nuk është superiore ndaj nesh. Ata nuk na kanë mposhtur që nga Kampionati Evropian. Faza e grupeve nuk ka të bëjë fare me ndeshjet eliminatore. Mendoj se do ta fitojmë Kupën e Botës”, përfundoi ai.