Zbulohen 1820 bimë Cannabis Sativa në Fushë Gjormë, arrestohet 40-vjeçari

Policia e Shtetit ka organizuar operacionin antidrogë të koduar “Vigjilenca 2” në fshatin Fushë Gjormë, ku janë konstatuar 1820 bimë të dyshuara narkotike të llojit Cannabis Sativa.

Në vendngjarje është kapur në flagrancë një 40-vjeçar me inicialet N. Xh., banues në Krujë, i dyshuar për kultivimin e bimëve narkotike.

Ndërkohë, vijon puna për kapjen e një bashkëpunëtori të dyshuar, shtetasit A. K., 54 vjeç, banues në Fushë Milot, i shpallur në kërkim.

Në cilësinë e provës materiale janë sekuestruar 2 automjete, 1 celular dhe sende të tjera që do t’i shërbejnë hetimit për dokumentimin e plotë të rastit.

Operacioni “Vigjilenca 2” është zhvilluar në kuadër të kontrolleve intensive në territor për parandalimin dhe goditjen e rasteve të kultivimit të lëndëve narkotike, ndërsa bimët e konstatuara janë asgjësuar nëpërmjet djegies.

Vijojnë veprimet hetimore dhe kontrollet në terren për dokumentimin e plotë të kësaj veprimtarie kriminale.