Zjarret në Indonezi, mbyllen dhjetëra shkolla

Autoritetet indoneziane kanë urdhëruar për të dytën ditë radhazi mbylljen e dhjetëra shkollave, ndërsa zjarrfikësit vijojnë të luftojnë me zjarret në disa zona të vendit.

Zjarri që shpërtheu më 3 gusht ka djegur rreth 742 hektarë në Parkun Kombëtar Bromo Tengger Semeru, në Javan Lindore. Parku, një nga destinacionet kryesore turistike të vendit, është mbyllur për vizitorët deri në një njoftim të dytë, ndërsa edhe Mali Bromo është ndaluar përkohësisht për turistët.

Në qytetin Pontianak, në Kalimantanin Perëndimor, nxënësit janë zhvendosur në mësimin online për shkak të cilësisë së dobët të ajrit. Mësimi nga shtëpia do të vijojë për sa kohë kushtet atmosferike mbeten të rrezikshme.

Rreth 50 mijë zjarrfikës dhe punonjës të emergjencave, të mbështetur nga dhjetëra helikopterë, po përpiqen të vënë nën kontroll zjarret në disa provinca.

Zjarret kanë përfshirë pjesë të ndryshme të arkipelagut në nisje të një sezoni të gjatë dhe intensiv të thatësirës, duke shkaktuar përkeqësim të ndotjes së ajrit.