Barakat në Vozhdovac u shembën nga shërbimet komunale — 13 banorë, përfshirë fëmijë, mbetën pa strehë

Shërbimet komunale, të shoqëruara nga policia, shembën të mërkurën barakat në vendbanimin informal në kryqëzimin e rrugëve Braće Jerković dhe Vojvode Vlahovića në Vozhdovac të Beogradit, duke lënë pa strehë 13 banorë — mes tyre fëmijë të vegjël dhe një foshnjë 4-muajshe — njoftoi sot Iniciativa A 11.

Sipas iniciativës, për disa nga banorët u siguruan kontenierë nën-standard vetëm pas kujtesave të përsëritura drejtuar komunës së Vozhdovacit dhe Qytetit të Beogradit për detyrimet e tyre ligjore, sipas të cilave asnjë shembje nuk mund të rezultojë në pabanesë. Autoritetet refuzuan të komunikojnë me Iniciativën A 11, përfaqësuesen ligjore të banorëve.

Iniciativa thotë se institucionet injoruan nevojat e banorëve për javë të tëra dhe ushtruan presion mbi disa prej tyre për të deklaruar se kishin strehim alternativ, edhe pse nuk kishin. Shembja e shtëpive të tyre të vetme, të cilat autoritetet i trajtojnë thjesht si mbetje komunale, u krye në kundërshtim me procedurat, pavarësisht këmbënguljes së Iniciativës A 11 dhe institucioneve të pavarura si Komisioneri për Mbrojtjen e Barazisë që të sigurohet strehim alternativ në përputhje me ligjin.

Iniciativa thekson se këta qytetarë, pjesëtarë të pakicës kombëtare rome, janë tani në rrugë, dhe i bën thirrje mbajtësve të funksioneve publike të marrin urgjentisht përgjegjësi dhe të veprojnë në përputhje me detyrimet e tyre ligjore ndaj prindërve dhe fëmijëve që i lanë pa strehë. Ekipi i saj ligjor ka punuar gjatë dy ditëve të fundit për të siguruar mbështetje urgjente për banorët e prekur.

Burimi: Danas