BE sfidon Shqipërinë dhe i lë ‘detyra shtëpie’, Kuvendi duhet të miratojë 41 nisma ligjore deri në fund dhjetorit!

Me objektivin për t’u anëtarësuar në BE deri në vitin 2030, mazhoranca qeverisëse nxiton nismat ligjore që të plotësojë kushtet, të paktën në letër. Madje, për këto, në seancën e parë parlamentare të këtij sesioni, bashkëpunim iu kërkua edhe opozitës.

Një nga ndryshimet më të diskutuara ka të bëjë me projektligjin për Bankën e Shqipërisë, dokument në të cilin synohet t’i jepet imunitet Guvernatorit dhe zëvendësguvernatorëve të tij.

Gjithashtu, një tjetër dokument i rëndësishëm ka të bëjë me prokurimet publike, të cilat qeveria mendon se mund të funksionojnë me inteligjencën artificiale.

Dhe, për sa i përket AI-së, mazhoranca synon ta shtrijë edhe në sektorë të tjerë, si në rastin e digjitalizimit dhe komunikimeve elektronike, apo deri në përpilimin e një ligji të veçantë për harmonizimin e rregullave mbi inteligjencën artificiale.

Shtatë nisma ligjore duhet të përgatisë Ministria e Financave për kapitullin e Tatimeve, ndërsa pritet të kemi një projektligj për tregjet e kriptoaseteve, informon “A2”.

Për peshkimin, një ndër kapitujt e vështirë për të arritur standardet e BE-së, qeveria pritet të ndërmarrë ndryshimet ligjore për ta përputhur me atë të Unionit.

Politika nuk mund ta shtyjë më ligjin për financimin e partive politike, pasi duhet të miratohen ndryshimet sipas opinioneve të Venecias dhe ODIHR-it, ndërsa duhet të bëhet edhe një ligj i ri për donacionet dhe sponsorizimet.

Praktika e mirë europiane kërkon që ligjet që i kërkon BE-ja të miratohen me konsensus, pavarësisht se situata politike nuk ka asnjë përmirësim as në nisjen e sesionit të ri.