Berisha përkujton Azem Hajdarin dhe thërret demokratët në mobilizim: O sot o kurrë! Në sulm!
Në 28-vjetorin e vrasjes së Azem Hajdarit, kryetari i Partisë Demokratike, Sali Berisha, ka përkujtuar figurën e liderit të lëvizjes studentore të Dhjetorit, duke e cilësuar atë si “tribunin legjendar të lirisë” dhe vrasjen e tij si “vrasja e shekullit për kombin shqiptar”.
Përmes një mesazhi të gjatë, Berisha akuzon qeverinë socialiste të vitit 1998 për përgjegjësi në ekzekutimin e Hajdarit, të cilin e cilëson si “atentat terrorist shtetëror”.
Sipas Berishës, vrasja e liderit të lëvizjes studentore ishte një akt hakmarrjeje ndaj një prej figurave kryesore të përmbysjes së sistemit komunist dhe vendosjes së pluralizmit politik në Shqipëri.
Berisha thekson se 28 vite pas vrasjes, kujtimi i Hajdarit vijon të mbetet frymëzues për demokratët dhe shqiptarët. Ai vlerëson kontributin e tij në lëvizjen studentore të Dhjetorit 1990 dhe në proceset demokratike që pasuan rënien e komunizmit.
Në mesazhin e tij, kreu i PD-së e lidh përkujtimin e Hajdarit edhe me situatën aktuale politike, duke u bërë thirrje demokratëve dhe strukturave të opozitës të mobilizohen për rikthimin e asaj që ai e quan “votën e lirë” dhe për fitoren e opozitës.
“Jeta dhe vepra e ndritur e Azem Hajdarit janë kushtrim për çdo demokrat dhe demokrate, anëtarë të thjeshtë, mbështetës të Partisë Demokratike, drejtues të strukturave në të gjitha nivelet e saj”, shkruan Berisha.
Në fund të mesazhit, Berisha përsërit thirrjen për mobilizim politik, duke iu drejtuar demokratëve me sloganin që lidhet me figurën e Hajdarit: “O sot o kurrë! Në sulm! Në sulm! Azem, ti je gjallë!”.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.