Demokratët kujtojnë Azem Hajdarin 28 vite pas vdekjes, Noka: Idealet e tij, frymëzim për PD

Azem Hajdari mungon familjarëve, miqve, Partisë Demokratike prej 28 vitesh. Ai hyri në politikë si prijës i Lëvizjes Studentore të Dhjetorit ’90, e cila gjunjëzoi diktaturën dhe i hapi rrugë pluralizmit politik.

Edhe pse i shkurtër në kohë, rrugëtimi politik i Azem Hajdarit ishte dominues, i njohur për akuza të forta dhe të drejtpërdrejta ndaj kundërshtarit. Këto akuza, sipas Azem Hajdarit dhe PD-së, ishin shkaku që ndaj tij u bënë disa atentate me motive politike, madje edhe në Kuvend, nga ish-deputeti socialist Mazreku.

Por mbrëmjen e 12 shtatorit ’98, Azem Hajdari dhe truproja e tij, Besim Çera, u qëlluan për vdekje pranë ish-selisë blu.

Familjarë dhe drejtues të PD-së zhvilluan homazhe në memorialin e ngritur në nderim të tij, shpallur pas vdekjes “Hero i Demokracisë”.

“Azem Hajdari sot bën apel se ka vetëm një rrugë për të rrëzuar regjimin dhe ajo rrugë është përballja, qëndresa, kryengritja”, tha deputeti i PD-së Flamur Noka.

Azem Hajdari u zgjodh kryetari i parë i partisë së parë opozitare në vend, asaj Demokratike. Më pas ai mbajti pozicione të larta në selinë blu dhe ushtroi detyrën e deputetit deri ditën që u vra.

/rtsha.l/