Drejt ribashkimit? Britani-BE, Burnham: Opsion që po e shqyrtojmë

Kryeministri britanik Andy Burnham ka sugjeruar se rikthimi i Mbretërisë së Bashkuar në BE është mes opsioneve që qeveria mund të shqyrtojë, në mënyrë që të reformojë marrëdhënien afatgjatë me Evropën.

Burnham tha për BBC se Brexit dhe marrëveshja që pasoi kanë bërë më shumë dëme sesa të mira dhe theksoi se dëshiron të shqyrtojë se “çfarë është e bëshme” për të riparuar marrëdhëniet.

Deklarata e tij vjen pas fjalimit të mbajtur të martën në Konferencën Laburiste, ku sugjeroi se do të eksploronte relata më të ngushta me bllokun, në një samit që zhvillohet më vonë gjatë vitit.

Lëvizja mund të shkaktojë një linjë përçarëse në zgjedhjet e ardhshme të përgjithshme, me konservatorët që e akuzojnë kryeministrin se po “përpiqet të rihapë plagët e vjetra, duke rifilluar betejat e viteve të para të Brexit”.

Javën e kaluar, Burnham e la të hapur mundësinë që në zgjedhjet e ardhshme të përgjithshme të kërkojë një mandat për t’u ribashkuar me BE-në.

Kur kandidoi për mandatin e deputetit që e riktheu në Parlament, ai premtoi se nuk do t’i rikthehej argumenteve të Brexit dhe se nuk do të propozonte aderimin sërish në Union.

Por komentet e tij të fundit janë sinjalizimi më i qartë deri më sot, se kreu i qeverisë mund të shkëputet nga parulla elektorale e vitit 2024, kur laburistët zotoheshin se do ta bënin Brexit funksional dhe përjashtonin rikthimin tek tregu i përbashkët i bllokut.

“Nuk dua ta lë çështjen e marrëdhënieve me BE-në pezull dhe dua ta kemi të qartë se ku duam të shkojë Britania në dekadën e ardhshme”, tha Burnham për BBC.