Eksperti i sigurisë: Ulja e numrit të yjeve në vlerësimet e bizneseve, sulm kibernetik kriminal! Dëmton edhe vendin

Eksperti i sigurisë, Faik Basha, e ka cilësuar uljen e numrit të yjeve në vlerësimet e bizneseve si një sulm kibernetik kriminal, duke theksuar se bëhet fjalë për një goditje të drejtpërdrejtë ndaj vendit dhe jo ndaj vetë bizneseve.

Sipas Bashës, sulmi vjen katër vite pas sulmit iranian dhe përbën një tjetër akt të drejtpërdrejtë kundër Shqipërisë. Ai u shpreh se një pjesë e mirë e organizatorëve të protestës janë vetëprononcuar publikisht si autorë të sulmit.

“Numri i yjeve, që përkthehet në vlerësim për bizneset, të bjerë deri në një yll. Kemi të bëjmë me një sulm kibernetik që shfaqet 4 vite pas sulmit iranian. Ky është sulm kriminal, janë sulme të drejtpërdrejta ndaj vendit. Nuk kemi të bëjmë me goditje të biznesit. Një pjesë e mirë e organizatorëve të protestës kanë dalë dhe janë vetëprononcuar që kanë qenë ata autorë të sulmit.

Në këtë protestë kemi parë të mirat dhe të këqijat, qytetarë që kanë dalë për problematikat e tyre. Në një vend nuk janë të gjithë të kënaqur. Në çdo vend shohim gjithmonë protesta dhe ky është tregues se vendi zhvillohet, është një tregues i mirë dhe i qytetarisë.

Nuk më kanë pëlqyer faktorët që kanë ndikuar për të organizuar këtë protestë. Ditët e para, deri në ditën e 10-të, njerëzit kanë qenë të dyzuar mbi realitetin ku jetojmë. Irani është investuar drejtpërdrejt që të kemi një goditje.”