FOKUS – BM vendos një paketë të re sanksionesh ndaj Rusisë

LONDËR, 6 gusht /ATSH -DPA/ – Britania e Madhe ka shpallur një paketë të re sanksionesh kundër Rusisë, duke synuar të rrisë presionin ndaj individëve dhe kompanive që mbështesin luftën e presidentit rus Vladimir Putin në Ukrainë.

Në listën e 19 subjekteve të sanksionuara përfshihen: 6 banka ruse; 6 cisterna të ashtuquajtura të “flotës në hije”, të përdorura për të shmangur sanksionet ndaj naftës ruse;
4 kompani ruse që importojnë tantal dhe niob – metale të rralla të rëndësishme për prodhimin e pajisjeve ushtarake.

Sekretari i Jashtëm britanik, Ed Miliband, deklaroi se këto masa tregojnë angazhimin e palëkundur të Londrës për të mbështetur Ukrainën dhe për të shtuar presionin ndaj Kremlinit.

“Lufta e Ukrainës është edhe lufta jonë. Ata që kërcënojnë lirinë dhe demokracinë e Ukrainës përbëjnë një kërcënim edhe për sigurinë e Britanisë. Do të vazhdojmë të rrisim presionin ndaj Rusisë derisa të arrihet një paqe e drejtë dhe e qëndrueshme”, u shpreh Miliband.

Njoftimi vjen pas takimit të tij në Uashington me Sekretarin amerikan të Shtetit, Marco Rubio, ku u diskutua për mbështetjen e mëtejshme ndaj Ukrainës.

Miliband tha gjithashtu se komentet e tij të mëparshme kritike ndaj presidentit Donald Trump nuk ndikuan në marrëdhëniet me Shtëpinë e Bardhë, pasi çështja “nuk u përmend” gjatë bisedimeve.