FOKUS – Gjermania ngre alarmin për kërcënime të mundshme nga Irani

BERLIN/TEHERAN, 13 korrik /ATSH-DPA/ – Politikanë dhe ekspertë të sigurisë në Gjermani kanë paralajmëruar për rrezikun e sulmeve iraniane në Evropë, pasi gazeta iraniane “Hamshahri” publikoi një listë me politikanë perëndimorë që, sipas saj, duhet të përballen me “hakmarrjen e popullit iranian”.

Mes emrave ishte edhe kancelari gjerman, Friedrich Merz.

Deputeti konservator Roderich Kiesewetter deklaroi se regjimi iranian mund të ketë planifikuar prej kohësh atentate dhe sulme terroriste në Perëndim, përfshirë Gjermaninë.

Sipas tij, Teherani përdor terrorizmin për të forcuar pozitat e tij brenda dhe jashtë vendit.

Kryetari i komisionit parlamentar për mbikëqyrjen e shërbimeve sekrete, Marc Henrichmann, tha se rasti tregon nevojën për vigjilencë më të madhe, duke paralajmëruar se shërbimet iraniane mund të kryejnë operacione edhe në Evropë përmes personave të rekrutuar për misione të veçanta.

Edhe përfaqësues të Partisë Socialdemokrate dhe të Gjelbërve e cilësuan situatën shqetësuese, ndërsa deputeti Konstantin von Notz tha se publikimi i listës ka shumë gjasa të jetë bërë me miratimin e udhëheqjes iraniane dhe përfaqëson një përshkallëzim të ri të kërcënimeve. /Ad.Ab./ a.jor.