“Fond kombëtar për strehimin”- Mbledhja e Qeverisë, Ibrahimaj: 7 mijë apartamente për shtresat në nevojë! Subvencion

Ministrja e Ekonomisë dhe Financave, Delina Ibrahimaj tha sot (11 shtator) se do të ketë fond kombëtar për strehimin.

Pas mbledhjes së qeverisë, Ibrahimaj u shpreh se do të ndërtohen 7 mijë apartamente për shtresat në nevojë dhe familjet e reja.

Gjithashtu, Ibrahimaj shtoi se do të ketë subvencionim qiraje për 3 mijë apartamente.

“Kemi pasur disa ndërhyrje në vite, kemi bërë subvencionimin e qirave. Kemi dhënë kredi të buta, kemi përmirësuar kushtet për banesa. Para disa javësh, shpallëm 300 kredi të buta për administratën publike, dje shpallëm programin e ri të strehimit. Qeveria dhe bashkitë bashkëfinancojnë programe. Dje prezantuam reformën e re, do t’i dedikohet edhe atyre që janë familje të reja. Do jenë 7 mijë apartamente që do vihen në dispozicion. 2 mijë kredi do jenë pa interes, për apartamente deri në 60 mijë euro. Normat e interesit, me 0 dhe 3 për qind, do të mbulohen nga një fond, do përmbledhë 3 përqindëshin e bashkisë, do përmbledhë buxhetin e shtetit, por edhe mekanizmat e tjerë të kredive”, u shpreh Ibrahimaj.

Më tej ministrja shpjegoi se:

“Do vëmë subvencionim qiraje për 3 mijë apartamente. Kemi mbi 80 për qind të qytetarëve shqiptarë, që jetojnë në banesën e tyre. Do fillojmë ndërtimin e disa blloqeve ndërtesash, 30 për qind do i dedikohen shtresave në nevojë, 40 për qind strehimit të përballueshëm, 30 për qind do i dedikohet shitjes në treg të lirë. E kemi parashikuar edhe një program që i dedikohet të moshuarve”.