Guterres: Këshilli i Sigurimit është i paralizuar nga përçarjet mes fuqive të mëdha

Sekretari i Përgjithshëm i OKB-së, Antonio Guterres, ka bërë thirrje për reformë urgjente të Këshillit të Sigurimit, duke argumentuar se përçarjet mes fuqive të mëdha kanë paralizuar funksionimin e tij.

Në një konferencë për shtyp të mërkurën, Guterres tha se disa prej fuqive të mëdha që janë pjesë e Këshillit të Sigurimit shkelin të drejtën ndërkombëtare, duke dobësuar aftësinë e këtij organi për të vepruar në mbrojtje të paqes dhe sigurisë.

Sipas tij, përbërja aktuale e Këshillit nuk pasqyron më realitetin e botës së sotme, pasi është krijuar dekada më parë dhe nuk përputhet me shpërndarjen aktuale të fuqisë globale.

Guterres paralajmëroi gjithashtu se mosfunksionimi i Këshillit po krijon një precedent të rrezikshëm, pasi vende të tjera mund të mendojnë se kanë të drejtë të veprojnë pa respektuar rregullat ndërkombëtare dhe pa u përballur me pasoja.

“Reforma e Këshillit të Sigurimit duhet të jetë një përparësi absolute”, deklaroi ai, duke theksuar se çështja lidhet në thelb me mënyrën se si shpërndahet dhe ushtrohet pushteti në botë.

Sipas kreut të OKB-së, dobësimi i institucioneve shumëpalëshe e bën gjithnjë e më të vështirë reagimin efektiv ndaj krizave dhe kërcënimeve ndaj paqes ndërkombëtare.