Lirohen gjashtë protestuesit e shoqëruar pas protestës para Kuvendit

Gjashtë protestuesit e shoqëruar nga Policia e Shtetit gjatë protestës së zhvilluar para Kuvendit janë lënë të lirë pas disa orësh në Komisariatin nr. 1 në Tiranë.

Gazetari i A2 CNN, Igli Çelmeta,në një lidhje direkte për Ditarin e Pasdites, nga ambientet e Komisariatit nr.1, raportoi se protestuesit u liruan pas përfundimit të procedurave policore.

“Pak minuta më parë është liruar edhe protestuesi i fundit, i cili ishte shoqëruar gjatë protestës së sotme nga Policia e Shtetit. Në total ishin gjashtë qytetarë protestues të shoqëruar nga policia,” raportoi gazetari.

“Për rreth 3 orë e 30 minuta qytetarët protestues u mblodhën në rrugën përballë Komisariatit nr. 1, duke protestuar dhe duke kërkuar lirimin e gjashtë qytetarëve protestues, të cilët më pas u lanë të gjithë të lirë nga Policia e Shtetit,” tha Çelmeta.