Manojloviq thërret qytetarët nesër para Prokurorisë në Beogradin e Ri: “Do të kërkojmë procedim penal kundër Šapiqit dhe paraburgimin e tij”

Savo Manojloviq, lider i lëvizjes “Kreni-promeni”, i bëri thirrje qytetarëve të mblidhen nesër në mesditë para Prokurorisë në Beogradin e Ri, për të kërkuar nisjen e procedurës penale kundër kryebashkiakut të Beogradit, Aleksandar Šapiq, dhe paraburgimin e tij, siç raporton portali serb Nova.rs.

Në konferencën për media, Manojloviq deklaroi se qytetarët janë të pakënaqur me situatën aktuale dhe e konsiderojnë të domosdoshme që institucionet e sistemit të reagojnë ndaj sjelljes së papërshtatshme të zyrtarëve publikë. Ai theksoi se duhet t’i vihet fund “parregullsive që ndodhin në Beograd” dhe të garantohet përgjegjësia ligjore e atyre që janë në pushtet.

Manojloviq u bëri thirrje të gjithë qytetarëve, organizatave dhe shoqatave t’i bashkohen protestës dhe të kërkojnë së bashku drejtësi. Ai theksoi se është e rëndësishme që zëri i popullit të dëgjohet dhe të tregohet se qytetarët janë të bashkuar në luftën kundër korrupsionit.

Në konferencë morën pjesë edhe aktivistë të tjerë dhe përfaqësues të partive opozitare, të cilët e mbështetën thirrjen e Manojloviqit, duke shprehur shqetësimin për situatën aktuale në Beograd dhe duke apeluar tek qytetarët të përfshihen për të ushtruar presion mbi autoritetet që të reagojnë.

Thirrja vjen pas incidentit për të cilin Šapiq u mor nga policia në stacionin e Beogradit të Ri për sulmin ndaj këshilltares së “Kreni-promeni”, Tanja Mićiq, dhe u lirua më pas. Šapiq ka mohuar se e ka goditur këshilltaren, duke thënë se e ka shtyrë në vetëmbrojtje.